I KNOW! - EK WEET!

"Die kinders noem dit “Slimtyd”, en hulle vra elke week wanneer kom die nuwe vrae!"
Laerskool Monte Vista

"Ons leer heerlik uit julle vasvraprogramme en die kinders geniet dit baie. Dit is 'n prikkel om koerant te lees, want hulle wil graag die antwoorde vooruit weet."
Hoërskool Heidelberg

"Dis die enigste aktiwiteit wat ek aanbied waar al 40 leerders aan elke woord hang wat ek sê. Daar is ’n sekere “towerformule” in die vra en antwoord van vrae."
Laerskool Bellville-Noord

"Ek WEET! vul ’n leemte in die kurrikulum op ’n weldeurdagte, praktiese dog prettige manier."
Laerskool Eversdal

"Weer eens dankie vir 'n wonderlike produk!  Ons kinders in die skool geniet die Algemene kennis "toetsies" wat hulle elke week doen. Daar is gedurig kinders wat my vra of die volgende aflewering al gestuur is. Weer eens dankie vir al u toewyding om die kinders van ons land se kennis te verbreed. Dit werp beslis vrugte af!!"
Mtubatuba Primêre skool, KwaZulu-Natal

"Baie dankie vir die bekendstelling van EK WEET wat ons vanoggend bereik het. Ek is vreeslik opgewonde daaroor, en wil onmiddellik ons skool inskryf. Ons is 'n klein privaatskool, Zoetendal Akademie, op L'Agulhas. Ons het 27 leerlinge, 3 leerkragte (myself ingesluit), en 'n wonderlike omgewing waarin leer kan plaasvind. Vrydae volg ons 'n fleksierooster, sodat EK WEET wonderlik gaan inpas. Die eerste twee kleintjies het klaar hul rande gebring, so entoesiasties  is hulle hieroor. "
Zoetendal Akademie, L’Agulhas

"Sjoe! Ek's verras - die kinders dink dis "cool" - dit help veral vir die koshuiskinders. Dankie - sterkte vir jul "wow" werk!"
HTS Middelburg

"Baie dankie vir die vasvra elke week! Ek en my klas is mal daaroor!"
Graad 3, Laerskool Panorama

"Hier by ons gaan dit klopdisselboom! Ons geniet die vasvra terdeë.
In die vorige reeks vrae (11 of 12) was daar vrae oor Irak, Arabies ens. Dit het 'n hele gesprek ontketen oor ander kulture. Ek het self ook baie geleer van die Moslem-geloof, wat net weer by my die besef tuisgebring het hoe min ons werklik van mekaar weet.  Ek voel julle program is van onskatbare waarde, en daar is geweldig baie ondersteuning daarvoor by die res van ons personeel.  Ek het nog nie een negatiewe aanmerking gehoor nie."
Sunridge Primary School, Port Elizabeth

"Die beste ding wat met ons skool kon gebeur het, was toe jy met die skoolhoofde van die Suidpunt Hoofdevereniging kom gesels het! Dit wat jy met ons gedeel het, kan ons nie in monetêre waarde verdiskonteer nie! Jy het 'n omwenteling hier by die skool teweeg gebring, waarvoor ons jou vir altyd dank verskuldig sal wees!
 
Kennis is mag! Om die leerders van die Laerskool Bredasdorp te bemagtig en te keer dat hulle met oogklappe deur die lewe gaan, word ons leerders weekliks met "Ek Weet!" Algemene Kennis-vrae bestook. Almal in ons skoolgemeenskap - leerders, opvoeders en ons ouers - sien met groot opgewondenheid uit na die temas en algemene kennis vrae wat julle vir ons stuur.
 
Die "Ek Weet!" vrae wat ons ontvang, strek oor al agt leerareas, dit komplementeer die nuwe kurrikulum en bemagtig ons leerders op 'n terrein wat verder strek as net Suid-Afrika. Dit maak ons leerders ingeligte wêreldburgers!
 
Daagliks word die "Ek Weet!" vrae in elke registerklas, vanaf Grade R tot 7, bespreek en Maandae tydens die saalbyeenkoms, word die leerders binne Fase-verband met vrae gepeper.  Een keer 'n kwartaal gaan al die leerders aan 'n Interhuis Algemene Kennis Vasvra Kompetisie blootgestel word.
 
Baie dankie vir die briljante projek en dat jy jou jarelange ondervinding op die gebied, eers as deelnemer en later as aanbieder, met ons deel! Dit word opreg waardeer!"
Johann Burger, Skoolhoof: Laerskool Bredasdorp

Ek wil net baie dankie sê vir hierdie jaar se harde werk. Oudergewoonte het ons weer ‘n heerlike algemene kennis-jaar gehad en ekself het baie geleer.  Ons interhuisvasvra in Oktober was ‘n groot sukses en deur almal baie geniet.  Ons gonsers werk nog goed en ons het ‘n paar nuwe idees vir die verhoogvasvra – miskien kan julle dit aan ander skole oordra as daar ‘n geleentheid is.  Ons het hierdie jaar begin met elke 5de vraag aan die gehoor, m.a.w. die deelnemers kry 4 vrae om te antwoord en die 5de word aan die gehoor gevra.  Ons het een onderwyser op die verhoog wat kyk min of meer watter hand gaan eerste op.  As die antwoord reg is, kry die kind se huis ‘n punt. As hy verkeerd is, trek ons geen punte af nie en gee die vraag oor aan die deelnemers op die verhoog.  Volgende jaar wil ons ook vir elke span ‘n A, B en C bordjie gee, by sommige vrae laat ons dan al die spanne antwoord, hulle moet eenvoudig die A, B of C bordjie opsteek, hulle kan dan almal punte kry vir dieselfde vraag (of punte verloor!).  Ook wil ons ‘n ‘power play’ doen soos in krieket, elke span kry ‘n bordjie wat op die lessenaar kan staan.  Hulle kry bv 3 geleenthede om te ‘power play’ gedurende die vasvra. Hulle kan kies wanneer om die bordjie op die lessenaar staan te maak en wanneer hulle dit doen, mag daar geen punte van hulle afgetrek word as hulle die vraag verkeerd kry nie.  Die spanne kan dit almal op dieselfde tyd doen, of op verskillende tye, net wanneer hulle dink dis ‘n goeie tyd. (Dit moet natuurlik tussen twee vrae gedoen word, voor die volgende vraag gevra word). 

Sunridge Primary School, Port Elizabeth